Скопје, 01.12.2025 година - “Европската Кошаркарска Недела“, организирана од Специјална Олимпијада Северна Македонија заедно со Кошаркарска Федерација на Македонија, а со поддршка на Фондот за население на Обединетите нации – УНФПА, “НЛБ Банка“ АД Скопје, “Македонски Телеком“ АД, “Лајонс Алфа Клуб“ Скопје и „Спорт Лајф“ на 29.11.2025 година (сабота) обедини повеќе од 100 атлети, тренери, партнери, поддржувачи и кошаркари, на еден кошаркарски терен, во СЦ “Кале“. Како дел од активностите, лицата со интелектуална попреченост, заедно со нивните партнери во Јунифајд (Unified) тимови, учествуваа во рекреативни кошаркарски игри. Преку заземање активно учество на атлетите во Европската недела на кошарката, заедно со ФИБА и Кошаркарската Евролига, Специјална Олимпијада на Северна Македонија повика на еднаквост и ја нагласи потребата за еднакви можности за сите.
Дополнително, во соработка со “Лајонс Алфа Клуб“ Скопје, на натпреварите им претходеше преглед на очите реализиран во рамки на програмата “Opening Eyes®”. Оваа програма се реализира на меѓународно ниво и обезбедува основни прегледи на видот за атлетите на Специјална Олимпијада. Целта на програмата е позитивно да се влијае на ставовите на оптометристите, офталмолозите, оптичарите, кои волонтираат во рамки на програмата, за грижа за лица со интелектуална попреченост. Волонтерите во рамки на програмата работат на едукација на атлетите, нивните родители, старатели и тренери, за важноста на видот во перформансите во спортот, училиштето и работата.
“Една од нашите главни задачи како огранок на Интернационалната Специјална Олимпијада е промовирањето на инклузивноста преку спортот - на терен, но и пошироко. Низ активностите кои ги реализираме на годишно ниво со атлетите, меѓу кои и Европската недела на кошарка, во пракса демонстрираме дека доколку на лицата со попреченост им се подаде рака и се вклучат во различни општествени сфери, добиваат можност да бидат еднакви како останатите. Нашите заложби во доменот на инклузивноста се препознаена од нашите пријатели од “НЛБ Банка“ АД Скопје, “Македонски Телеком“ АД, УНФПА, “Лајонс Алфа Клуб“ Скопје, „Спорт Лајф“, како и од Кошаркарската Федерација на Македонија, за што сме исклучително благодарни. Благодарение на нивната поддршка, имаме можност поактивно да придонесуваме за негување на инклузијата во нашата земја. Верувам дека во духот на спортот и спортските вредности ќе продолжиме во ваков манир и заедно ќе продолжиме да придонесуваме за поинклузивно општество.“ – изјави Моника Бошкоска, Претседател на Специјална Олимпијада Северна Македонија.
Успешната реализација на Европската недела на кошарка ја потврди посветеноста на Специјална Олимпијада Северна Македонија во унапредувањето на инклузијата преку спорт. Настанот ја нагласи важноста од долгорочна соработка, координирани активности и постојана поддршка за обезбедување еднакви можности за лицата со интелектуална попреченост. Организаторите изразија благодарност до сите партнери, учесници и волонтери за нивниот континуиран придонес кон оваа заедничка мисија.
